Prima parte
La caccia, lu iuorno re l’apertura,
pare na festa adderettura,
prepare tutto la sera ranande:
fucile, cartucce e cappiello berbante.
La notte nun duorme, sempe agetato,
te uote, te gire ra l’atu lato,
e quanno po’ t’auze chino re suonno,
te pare mill’anne ca face iuorno.
E invece se sape, è cosa vecchia,
ca quase sempe fenisce a fetecchia;
ma nun ce pienze, pecché sta iurnata
tiene nu pranzo ammartanato:
spaghette, pollo, cuniglio e vetello,
po’ te faie arrustuto l’agnello,
pienze a lu vino ch’è ind’a lu puzzo
e se n’adda scenne cum’a nu uzzo.
Li iuorne appriesse po’ vene ru bello,
quanno nun tiene né pollo né agnello,
gire e camine iurnate sane
a se te puorte nu tuozzo re pane,
e quanno te siente fernuto e stracquo
nun truove manghe na veppeta r’acqua;
ma nun t’arrienne, camine ancòra:
che bruttu destino lu cacciatore!
Ritornello
Vaie camenanno Calaggio e Mulito,
lu Furmecuso, Fundana Fiurita,
scinne a lu Ciampo, ’nghiane a la Toppa,
è tiempo perso, manghe na botta!
Passe a la Vralia, a li Vacandale,
po’ vaie a la Forma e a li Mundale;
utte n’allucco, chiame lu cane,
curre a li Chiane re re Fundane.
Gire e camine la storia nun cange,
arrive a la Preta re Buscustrangelo;
po’ cange zona, faie Tierze e Petrara,
te faie lu Monte e la Serpendara ;
miende te truove a re Balandogne
curre a re Serre re Cerogna;
faie n’affacciata a la Preta re ru Gesso
e pure sta ota rieste ra fesso!
Po’ faie na penzata: “Pe lu remonio,
mo vaco a li Iazze re Sant’Andonio”,
e po’ passe pure pe Castiglione,
scinne peffino a lu Lione,
te faie Chiancarelle, Refesa e Matina,
Tuoro, Astubello e la Carusina,
e te ne tuorne peffino r’Auriglia
sempe chiù careco re maraviglia!
Seconda parte
V’ho nominato quaranta contrade
Manghe n’auciello aggio ‘nguntrato,
na ota è passato, ma quanno l’ho visto
già stia parlanno cu Gesù Cristo.
La caccia è fernuta, è n’illusione,
te resta la tassa a la Regione;
ma quisse so’ pacce, che banne truanne,
olene tutto e niente te ranne.
Qua lu prublema è la selvaggina,
nge resta sulo lu piccioncino
sì so’ d’accordo ch’è quiro re torre
e se vere ogne tante a morre a morre;
ma questo è proibito: non si può sparare,
e allora ditemi: che cosa fare?
Lu cacciatore ca gira ‘nvacande
Sempe la spara na botta ogne tante.
E allora amice, parlamece chiaro,
qua mo la caccia nun è chiù n’affare,
nun è chiù lu tiempo re li carniere,
mo s’esse sulo pe scacciapenziere.
Se perde tiempe, suonno e salute,
ma pe furtuna non tutto è perduto:
te resta l’aria ch’è quella strafina,
la puoi respirare a prima matina!
Ritornello
E allora siente nu bellu prufumo,
nun vire manghe nu filo re fumo,
re la campagna siente l’addore
ch’abbola ‘mmocca a lu cacciatore:
cu la faloppa e la faluppella,
cu la restoccia e re mammarelle,
re capeianghe e li funucchiastre,
re tammarice cu la mendastra.
‘Ngundre il trifoglio, l’alessandrino,
na bella chianta re putresino,
vire re spruscene cu re cardogne,
li revetale cu re vendogne,
la lupenella e lu pilo crapino,
macchie e genestre ‘mmiezz’ a re spine,
stocchie e scalere cu la pagliaoglia,
sotto a nu chiuppo… belle maroglie;
trigne, erba medica, quatte vetose,
filece, salece e cagge spenose,
ivele e caule, duie rafanielle,
mmocca nu milo ma a lemungielle,
ddoie pummarore, fenucchie e cetrule,
tu n’apprufitte…tante si sulo;
tutto lu riesto so brutte leziune,
so sacreficie, surate e acquazzune…
Finale
Nun ne parlame po’ ind’ a lu scascio
Na cossa chiù erta e n’auta chiù bascia,
se nun tiene l’uocchie ma buone apierte
cu niente te curche e nun si chiù alerte.
E voglio finire questa ballata
cu na battuta ormaie stagionata:
Chi vaie a caccia a pile e a penne
Niente s’ accatta e ru suio se venne!
Dario D’Arena
|