Comme s'è fatta longa sta nuttata
n'eternità me pare ogni minuto...
meglio si nun t'avesse maie ncuntrata,
comme s'è fatta longa sta nuttata!

RIT:
Chist'uocchie ca te guardano,
sti mmane ca se stenneno
penzanno 'e te tuccà...
E' tutto assurdo e inutile,
sì sulamente immagine
ca mò me fa dannà,
Lassame mpace st'anima,
fallo pe carità,
turmiento 'e na nuttata,
t'aggia puté scurdà.

'E vvote basta sulo nu mumento
pe te sentì 'o ffuoco dint' 'e vvene,
pe te sentì accussì, mpruvvisamente
na smania 'e desiderio, 'e vulé bene...
'E vvote basta sulo nu mumento!